ബ്രെയിന് ഡാമേജ്

നാട്ടില് ചെന്നാല് കൂട്ടുകാരുമായി ഒരു രണ്ടു ദിവസം ചിലവിടണമെന്ന വിചാരമാണ്, പോകാനുള്ള ഒരുക്കങ്ങള്ക്കു ഒരു ഊറ്ജ്ജം തന്നത്. പല നാട്ടില് കിടക്കുന്ന കൂട്ടുകാരെ ഏകൊപിപ്പിച്ചെടുക്കണമെങ്കില് വളരെ നേരത്തേ ഒരുങ്ങണമെന്നറിയാമായിരുന്നതു കൊണ്ട്, എല്ലാവറ്ക്കുമായി ഒരു മെയില് അയച്ചു. ഏകദേശം ഇതു പോലെ;

സുഹൃത്തുക്കളേ,

ഞാന് xx-xx-xxxx മുതല് xx-xx-xxxx നാട്ടിലുണ്ടാകും. എല്ലാവരെയും കണാന് അതിയായ ആഗ്രഹം ഉണ്ട്. നമുക്കൊന്നു ഒത്തു കൂടിയാലോ. ഒരു പകലും രാത്രിയും, പഴയ അനുഭവങ്ങളൊക്കെ അയവിറക്കി പിരിയാം. കുമരകമാണ് എന്റെ മനസ്സിലുള്ളത്. ഒത്താല് ഒരു ഹൌസ് ബോട്ടെടുക്കണം, രാത്രി ഏതെങ്കിലും ഒരു റിസോറ്ട്ടില് തങ്ങി രാവിലെ പിരിയാം

.......

ആറ്ക്കെങ്കിലും പ്രത്യേകിച്ചെന്തെങ്കിലും ഇവിടുന്നു കൊണ്ടു വരണമെങ്കില് പറയാന് മടിക്കരുത്.

സ്നേഹപൂറ്വ്വം
കുട്ടന്

രണ്ടു ദിവസം കഴിഞ്ഞിട്ടും ആരും മറുപടി അയക്കുന്നില്ല. ഫോണ് എടുത്തു വച്ചു ഓരോരുത്തരെയുമായി വിളിച്ചു തുടങ്ങി. ഒഴിവു കഴിവുകളുടെ അയ്യരു കളിയാണ് ഫോണിലൂടെ കേട്ടു തുടങ്ങിയത്. ഭാര്യയുടെ അനിയത്തിയെ പ്രസവത്തിനു കൊണ്ടുപോകല്, അമ്മായപ്പനു ഹെറ്ണിയക്കു അരിപ്പയിടല്, അമ്മായമ്മയ്ക്കു തലയില് പേന്, എന്നു വേണ്ട മുട്ടാപ്പോക്കുകളുടെ ബഹളം. ഏതായാലും ഇത്തവണയും നാട്ടില്ചെന്നാല് ബന്ധു വീടുകള് കയറി ഇറങ്ങി, ഡോളറ് ഷോപ്പില് നിന്നും ഏതെടുത്താലും ഒരു ഡോളറ് എന്ന കണക്കിനു വാങ്ങിയ സാധനങ്ങള് വിതരണം ചെയ്യല്, അമ്മായപ്പന്റെ വീരവാദം കേള്ക്കല്, ഭാര്യ വീട് - സ്വന്തം വീട് ഷട്ടിലടി, ബാക്കി സമയം ഉറക്കം; പിന്നെ ബോണസ്സായി കൊച്ചുങ്ങളുടെ അസുഖം അതിന്റെ ചികിത്സ തുടങ്ങിയ സ്ഥിരം കലാപരിപാടികളില് ഒതുങ്ങം എന്നു മനസ്സിലായതോടെ പോകാന് ഉള്ള ഉന്മേഷം താനേ കുറഞ്ഞു.

വരാനുള്ളതു വഴിയില് തങ്ങില്ലല്ലോ, പ്ലെയിനില് കയറിയപ്പോള് മുതല് കാറാന് തുടങ്ങിയ രണ്ടു പിള്ളേരേം എടുത്തു, ഒരു വിധം വീടെത്തി. സ്ഥിരം കലാപരിപാടികള്ക്കു തുടക്കമായി. എന്നാല് ഒരു അവസാന കയ്യെന്ന നിലയ്ക്കു എല്ലാവറ്ക്കും ഒരു ഈമെയില് കൂടെ വിട്ടു; ഇതു പോലെ.

ഡാ മൈ.. കളേ,

ഞാന് നാട്ടില് എത്തി. നിങ്ങള്ക്കു നിങ്ങളുടെ ഭാര്യമാരെ വിട്ടു ഒന്നു രണ്ടു ദിവസം ഒറ്റയ്ക്കിരിക്കണമെന്നു തോന്നുന്നുണ്ടെങ്കില്, xx-xx-xxxx കുമരകത്തെത്തുക.

കുട്ടന്

ഒറ്റ വരി. അതു മറ്മ്മത്തു കൊണ്ടു. മറുപടി പ്രളയമായിരുന്നു. ഭാര്യയില്ലാതെ ഒറ്റയ്ക്ക്, കൂട്ടുകാരുമൊത്ത്; ആ ആംഗളില് ചിന്തിക്കാനുള്ള ശേഷി നഷ്ടപ്പെട്ടു പോയടെയ് എന്നു നേരില് കണ്ടപ്പോള് എല്ലാവരും സമ്മതിച്ചു.